വടകരയിൽ വർഗ്ഗീയമായി ചേരിതിരിവുണ്ടാക്കാനുള്ള ശ്രമമാണ് നടന്നത്; വി വസീഫ്

മലപ്പുറം: വടകര വർഗ്ഗീയതയെ അതിജീവിക്കും എന്ന പേരിൽ ഡിവൈഎഫ്‌ഐ യൂത്ത് അലർട്ട് സംഘടിപ്പിക്കുമെന്ന് മലപ്പുറത്തെ എൽഡിഎഫ് സ്ഥാനാർഥി വി വസീഫ്. ''വടകരയിൽ വർഗ്ഗീയമായി ചേരിതിരിവുണ്ടാക്കാനുള്ള ശ്രമമാണ് നടന്നത്. യൂത്ത് കോൺഗ്രസ്സ് നേതൃത്വം വ്യാജ ഐ ഡി കാർഡുണ്ടാക്കിയ പോലെ വ്യാജ പ്രചാരണം നടത്തുകയായിരുന്നു. യൂത്ത് കോൺഗ്രസും ഷാഫിയും രാഹുലും എല്ലാം വ്യാജമാണല്ലോ. അതുപോലെയാണ് വ്യാജ പ്രചാരണങ്ങളും'' വസീഫ് പറഞ്ഞു.

മലപ്പുറത്ത് ലീഗ് എം എൽ എ മാർ ബൂത്തുകളിൽ കയറി വോട്ട് തേടുകയും സെൽഫി എടുക്കുകയും ചെയ്തു. പെരിന്തൽമണ്ണയിലെ ബൂത്തുകളിൽ നജീബ് കാന്തപുരം എം എൽ എ ബൂത്തുകളിൽ കയറി വോട്ടഭ്യർത്ഥിച്ചു. 85 , 86 ബൂത്തുകളിൽ കയറിയാണ് വോട്ടഭ്യർത്ഥിച്ചത്. ഇതു ചുണ്ടിക്കാട്ടി പരാതി നൽകും. തന്നെ കയ്യേറ്റം ചെയ്ത സ്ഥലത്ത് മഞ്ചേരി എം എൽ എ ഉണ്ടായിട്ടും തടയാൻ ശ്രമിച്ചില്ലെന്നും വി വസീഫ് ആരോപിച്ചു.

മേയർ ഡ്രൈവർ തർക്കത്തിൽ ആര്യ രാജേന്ദ്രന്റേത് സ്വാഭ്വാവിക പ്രതികരണമാണ്. എന്താണ് നടന്നത് എന്നറിഞ്ഞിട്ടും അവരെ ആക്രമിക്കുന്നത് ശരിയായ നടപടിയല്ല. ഇടതുപക്ഷമാണെങ്കിൽ വേട്ടയാടപ്പെടണം എന്ന സമീപനം മാധ്യമങ്ങൾ അവസാനിപ്പിക്കണമെന്നും വി വസീഫ് പറഞ്ഞു.